سؤال [محلولة] هل المشكلة في أم في الناس؟

السلام عليكم
عندي مشكلة والحقيقة لا أعرف هل العيب فيا ولا لأ.

تتلخص المشكلة أني لما حد مابيردش عليا أكثر من مرة بتضايق, ولكثر ما الموضوع بيتكرر معايا (أي أن يتم تجاهلي) بدأت أحس أن المشكلة من عندي مش معقول الناس كدة كلها.
اعطي مثالا حتى أوضح.

مثلا أكلم حد على الواتساب, فيرى الرسالة ولا يرد. فأقوم بتذكيره بعد مدة لعله كان مشغول ونسي فيرى ولا يرد, فأكرر عدة مرات (واترك بين المرة والمرة وقت ) ومع ذلك لا يرد.

المشكلة أن ده بيتكرر معايا, وأنا باشعر أن ده عدم احترام لشخصي أن حد يتجاهلني مرة واتنين وتلاتة (وللعلم أنا باعذر كثيراً , ولكن بعد مدة الموضوع بيضايقني وببقى حاسس أني اتهانت شخصيا ومش عارف هل أرد بعنف مثلا ولا اتصرف ازاي)

مثلا, أحد الناس تواصلت معه (ليس بيني وبينه أي معرفة سابقة) لأسأله عن بعض الأمور بحكم خبرته. في البداية عرفت نفسي واستأذنته هل ممكن اسأله ولا لأ, ولما أذن لي بدأت اكتب له, وهو في البداية كان بيرد علي ثم بعد كدة بدأ يرى الرسائل ولا يرد, بعتت له مرة أخرى (كان المفروض أننا واقفين على أني منتظر منه إجابة على سؤال ما)
وكذلك لم يرد.
ذكرته مرة أخرى بعدها بعدة أيام, فرد وقالي ما معناه أنه مش عايز يرد (خاتما رسالته بمتزعلش مني). أنا معنديش مشكلة لو قال لي من أول مرة أنه لا يريد جواب السؤال مثلا (رغم أنه قال بداية أنه هيجاوب وكان الموضوع واضح بلا خفاء مثلا), لكن أنه يرى و "يطنش" فأنا باشعر أن هذه إهانة شخصية لي وبتضايق أكتر لأني مش عارف ارد ازاي.

هذا يتكرر معي حتى في الحياة بعيدا عن العمل, مثلا أكون واقف جمب المدرب في الجيم لاسأله وهو بيتكلم مع حد تاني واقف جمبه, فهو يخلص معاه ويقوم سايبني وماشي ولا كأني واقف, وهذا يتكرر كما قلت لحضرتك وإلا لو مرة ولا شيئ كنت تغاضيت عادي.

فالسؤال, هل ده طبيعي وأنا اللي حساس أكثر من اللازم؟ أم فعلا اللي بيحصل معايا في حالات مثل دي غلط؟ وفي هذه الحالة كيف يكون الرد المناسب؟ (خصوصا لأني اشعر بالإهانة )

هذا علما بأني في تعاملي مع الناس مش بعمل كدة. يعني لو حد بعتلي مثلا فإما أني برد عليه أو لا افتح الرسالة اصلا (لأني مشغول) أو أفتح واقوله أني مشغول ممكن تكلمني في الوقت كذا أو ذكرني لو مردتش عليك ...إلخ من الأمور. كذلك لما حد يكلمني أو يقف معايا مش بطنشه ولا بركز معاه نص تركيز (فضلا عن أني أسيبه وامشي)

وآسف على الإطالة وجزاكم الله خيراً