أنا في سنة 5 في كلية طبية ما -مش طب بشري-، وفي نفس الوقت بقالي مدة بذاكر برمجة، وأنا دلوقتي محتار أركز على ايه، نظراً لأن الجمع بين مذاكرة cs والتدريب والمذاكرة بالنسبة للكلية صعب جداً وغالباً لو عملت الاتنين فعلى ما أتخرج السنة الجاية، إن شاء الله، فمستوايا هيكون مش حلو في الإثنين.
أسباب إني عايز أشيفت هي إن عمري ما حبيت الكلية أوي يعني، وشوفت نظام الشغل في التدريبات وما حبيت أمور كثيرة فيه، وبخاف أعمل حاجة غلط تؤذي حد، وأنه أنا موسوس وتخصصي تحديداً مليان بالنجاسات، دا لوحده معاناة، وأن فيه أمور محرمة معينة كدا في العمل يصعب تجنبها.
أسباب أني متردد هي أنه فيما رأيت ف قليل جداً أنك تلاقي عمل دلوقتي ومفيهوش محرمات خالص، فلازم تتصرف هنا أو هناك وتتجنبها، وأني وإن كنت حاسس أني ماشي لحد دلوقتي كويس وحابب الموضوع لكن مستتقل أبدأ في مجال جديد تماماً دلوقتي وأجرب إن كنت كويس فيه أصلاً ولا لأ وبقول ما تكمل في اللي عارف البيزكس بتاعته ومش لسه في مستوى كورسز CS1xx دا، وأسباب مادية هي أنه وضعنا مش أحسن حاجة، فموضوع أني أفضل أذاكر ومبدورش أصلاً على شغل دا هيكون صعب شوية، فاهم طبعاً الرزق بيد الله، حضرتك فاهم قصدي عموماً أكيد بالنسبة لموضوع الماديات دا.
تفكيري غالبًا مش مترتب أو فيه خلل فعايز أعرف رأي حضرتك إيه؟ أي نصيحة؟
طبعاً الجمع بين الاثنين مش في مصلحتك نهائي
لكن اللي لازم تاخد بالك منه إنك في سنة خامسة، والحقيقة الأسباب اللي إنت ذكرتها مش أسباب لترك الكلية. عندك وسوسة يبقى تعالج الوسوسة وتتعلم أحكام الطهارة والنجاسة، خايف تعمل حاجة غلط تتعلم كويس وتفهم حدود الممارسة كويس، مفيش حاجة من دي "معاناة" على حد تعبيرك لو انت عالجت المشكلة بدل ما تهرب منها
والحقيقة مجال البرمجة برضه مش مجال سهل. سيبك من العمل الخالي من الحرام لأنه موجود كتير انت بس اللي مش فاهم الدنيا فيها إيه. لكن اللي يهمني تعرفه إنك عشان توجد لنفسك فرصة عمل لازم تبذل مجهود وتركز
فالحقيقة السؤال اللي لازم تسأله لنفسك مش أكمل هنا ولا هنا، السؤال اللي لازم تسأله لنفسك هو "ليه عايز أغير مجالي؟" لأن لو للأسباب اللي ذكرتها فدي أسباب غلط ولو جريت وراها حتحس إنك عايز تغير مجالك كل ما تلاقي حاجة مش عاجباك. إنما لو فيه أسباب حقيقية فعلاً يبقى ساعتها نتكلم في فكرة الانتقال وجدواها وطريقتها
خد بالك من حاجة، الوسوسة باب بلاء كيبر لو سبته مفتوح حيعكر عليك حياتك كلها، فلازم تقفله بالضبة والمفتاح. لازم تتعلم ازاي تتجاهل الوساوس وتبني قرارات موضوعية. وده زي ما قلت لك: السبيل إلى ذلك هو تعلم الأحكام الخاصة بالأمور اللي إنت موسوس فيها (الطهارة، الحلال والحرام، إلخ) وإنك تتعلم ازاي تتجاهل الوسواس ولا تتمادى معاه. لأن غير كده الأمر حيتطور معاك وحتدخل في منحدر ربنا يعافيك منه
والله أعلم
____
لو كنت قد أجبت سؤالك بالشكل الكافي يرجى الضغط على زر (✔️ محلولة) في يمين الجواب، أو الضغط على (💬 أضف تعليقاً) تحت هذا الجواب للاستفسار أو التوضيح