مشكلتي مع المواقف الصغيرة بعطل وبتكدر، مثال : لو السكينة الحامية مفقودة ومضطرة أقطع بسكينة باردة، لو معرفتش أحل المسألة صح من أول مرة، لو الكبة مهنجة وهقطع البصل يدويا وهاخد وقت أطول، لو البقال اللي بشتري منه على طول قافل وهضطر أمشي حتة زيادة أروح محل تاني.
بتعطل بمعنى إني بتكدر وبيستهلك مني طاقة نفسية كبيرة كأني شايلة هم وبالتالي بستنفد طاقتي ومش بقدر أكمل باقي تاسكات اليوم أو بكروتها أو بسوفها، بعمل ده بقالي أكتر من سنتين وبضيع أيامي في كلام فارغ
ومن جهة أخرى بتعامل مع الأزمات *الحقيقية* كويس جدا وبهمة وطاقة نفسية عالية، مثال: محتاجين نفضي المسقط من كراكيب السنين وأكوام التراب والكتب انهاردة، كان تاسك متوقع اتنين يعملوه عشان ع الأقل الحاجات التقيلة وإنه هياخد يوم كامل شامل التنضيف، عملته كله لوحدي في 3 ساعات ونص ونضفته عاليه واطيه مسبتش فيه ورقة، مثال تاني أقدر أخدم حد سواء طفل أو حد كبير في السن وأغيرلهم وأأكلهم إلخ ومنامش إلا 4 ساعات على مدار كذا شهر وبسد عادي وبأدي كويس بطريقة أنا نفسي بستغربها وبتبقى نفسيتي مستقرة جدا وهادية، كان فيه فترة شهور كنت بشتغل وبدرس وبخدم وبعمل شغل البيت وبنام عدد ساعات عبيط وكنت بسد عادي
عادة أنا الشخص المناسب للأزمات بيصدروني في المهمات الصعبة ويكملوا هما التاسكات الصغيرة اللي بعطل عندها عشان منهارش، ساعات بختار التاسكات الصعبة بمزاجي عشان مقرفش نفسي وأبقى بلا فائدة
الحياة أغلبها النموذج السهل والحمدلله دي نعمة لكن أنا مش قادرة أتعامل مع النموذج السهل ولا العقبات السهلة وبنهار فيها لكن الأزمات أسهل عليا نسأل الله العافية بس أنا مش عارفة اتأقلم
المهمات السهلة في الأيام السهلة دي لو عملتها بنفسيتي وأنا في الأزمات كان زماني أنجزت كتير جدا
هل دي مشكلة؟ ولو مشكلة إيه الحل؟