خطيبي بيكدب في أمور تافهة بيستسهل الكذب عشان محدش يزن عليه زي أمه تقوله مرنتش ليه يكدب ويقول مش معايا رصيد جده يقوله مقولتليش عن موضوع كذا ليه يقوله الموضوع لسه حاصل من يومين والموضوع كان قبلها بشهرين حد من الشغل يرن عليه يقوله جايلك وهو ناوي ميرحش ابوه يرن عليه يقول مجتش ليه يقوله لسه راجع من الشغل وهو بيكون رجع ونام وكدب عليا مرتين قلتله ليه كده قال عشان متزعليش.. واجهته عن الموضوع قال أنا شايف إنها حاجة عادية ولو حاجة غلط مش هحكيها ليكي وبعدين رجع قال هصلح من نفسي بس حسيته قالها وهو مش مقتنع إن ده موضوع كبير فقلتله محدش بيتغير عشان حد.. فحاليا أتصرف ازاي ممكن نصيحة لأن محتارة جدا..
أنا كنت سألت حضرتك على الآسك أول ما اتقدملي وإنه في التدين مش شبهي بس هو بيرجع للحق فقلتلي دي نقطة مبشرة وتوكلت على الله.. بس طبيعي بعد ما اتفق معايا إن الفرح مش هنشغل أغاني يفضل على طول يهزر ويغيظني إن هجيب دي جي في الفرح وهشغل أغاني في البيت أنا والأولاد بعد ما تخرجي وحجته إنه بيهزر بس هزار بيقفلني
ماينفعش تسألي "أتصرف ازاي" قبل ما تحددي "تتصرفي في إيه؟"
عشان تسألي عن حل، يبقى لازم تحددي المشكلة الأول
إيه المشكلة اللي عايزة تتصرفي فيها؟
إيه اللي عايزة تعرفي له حل؟
اللي يساعدك إنك تسألي نفسك سؤالين:
١- إنتي عايزة إيه؟
٢- إيه اللي مانعك أو إيه اللي نقصك عشان توصلي له؟
فكري في السؤالين دول على مهلك، وفكري تاني ماتدوريش على أول إجابة، لأنك واضح إنك قلقانة، والقلق حيخليكي ماتعرفيش تركزي في الإجابة. ولما توصلي لإجابة انتي مطمئنة ليها قولي لي وأجاوبك بإذن الله
المشكلة عندي في عقلي وتساؤلاته الكتير.. من ٥ سنين وأنا في صفحة حضرتك على الآسك وبتابع الأجوبة بنهم ومنها أجوبة زجرك للشباب وتعليمهم الرجولة.. من هنا كونت فكرتي عن الجواز مش بطلب كلية أو وظيفة معينة ولا دهب بمبلغ ولا شقة ملك ولا شكل معين حتى التدين رضيت يكون أقل مني بس يكون بيخاف ربنا فعلا وبيستجيب للصح ولو مش هيشجعني أستزيد ميحبطنيش ويسخر مني.. فكل اللي أتمنيته أتجوز راجل راجل في أقواله وأفعاله وتعامله معايا وميسبنيش ويسافر لأن بكره الوضع ده.. هل اللي بطلبه ده صعب؟
حضرتك قلتلي مرة ركزي مع نفسك أكتر من خطيبك ونبهي للخطأ مرة وبس كده حاولت على أد ما أقدر أعمل كده بس هو اللي بيظهر نفسه وتغافلت عن العيوب على أد ما أقدر حتى في أهم نقطة عندي وهي الرجولة تنازلت.. مكنش مفهومي عن الرجولة إنه يسخر من أخواته وأخواله ولا إنه يحكي مشاكل أهله بالتفصيل ولا إنه بيغتاب الناس ويبقى أنا دوري المدافع وأحاول أظهر الجانب الحلو عشان مشيلش وزرهم وأهم نقطة إنه يكدب عشان يريح دماغه وكانت بداية الكدب لما سألت الوسيط عن السجاير قال شرب كام يوم في الجيش وبطلها وهو بعد ٤ شهور خطوبة جاي يعترفلي إنه كان بيشرب وقت لما الوسيط سأله بيحكيلي إنه بطل عشاني وإنه كان بيحاول قبلها وفشل فهل أصدق إنه بطل عشاني ومكنش لسه في رؤية شرعية حصلت أصلا ولا شافني بس أنا عديت الموقف.. تاني لف ودوران يوم الدهب قالي جه أقل من المبلغ ب٨٠٠ جنيه ولما بابا تاني يوم قالي اسأليه لو دفع زيادة نروح نرجع من الدهب عشان منتقلش عليه قالي قوليله حوالي ٥٠٠ جنيه أقل عديت الموقف وإن المفروض باقي المبلغ يرجعلي حتى لو ١٠٠ جنيه بس عديته.. وعدني في الرؤية إنه مش هيسافر لأن ده خط أحمر عندي يجي بعدها يقنعني بالكلام البلد وظروفها ومش هعرف أحقق حاجة وهسافر واخدك لما أعرف عديت الموقف بردو.. سؤالي هل اللي بيحصل ده من الرجولة وإخلاف الوعد معايا بيقولي ماشي وبس حتى وهو بيقولها بحسه بيسكتني وخلاص؟
أنا عمري في حياتي ما كدبت حد أبدا وهو بيحكيلي حاجة ولا سألت نفسي لثانية بيكدب ولا لا بس لما حكيت لأهلي عن خطيبي قالوا موسوسة ومتشددة شوية وإن الكل بيكدب الكدبات الصغيرة دي عشان الدنيا تمشي فأنا بقيت اسأل نفسي وأنا بكلم خالتي هل هي ممكن تكون بتكدب هل أخويا كدب عليا قبل كده هل الكل ممكن يكون كدب عليا قبل كده.. حسسوني إني غريبة وإنه ياريت عقلي زيهم وأعيش وأسكت وخلاص وأطلع من دور البنت اللي عندها مباديء مش هتخليها تتجوز وسط القرية المعزولة وإنها وهي لسه عندها ٢٤ سنة سموها عانس..
خطيبي النهاردة لما حس إني تغيرت جاي يقولي إنه نوى يصلي الفجر وسمع بودكاست عن السيرة وعايز يحفظ قرآن التغير المفاجيء ده مش مرضي أبدا ليا ووضع حسسني بالذنب إني وصلتله شعور أنت مش مقبول ومحتاج تغير من نفسك عشاني..
مشكلتي اللي عايزه حل ليها هي عقلي فعلا أنا تعبت من التفكير حاسه إني بحارب جوه عقلي نفسي أعزل نفسي كام يوم عن الكل وأفضل أعيط وبس..
والمشكلة التانية قولي طريقة أقدر أعرف بيها هل هتقبل خطيبي وكدباته دي هل هقدر أعيش معاه؟
نقطة الدهب أنا عارفة ممكن تكون غلطة ممكن بص فالفاتورة وعرف الرقم وممكن كلامه على أهله يكون عشان استفزوه تفسيرات كتير.. وهو ده اللي مخليني بفكر ومخوفني جدا إني أكون بظلمه بأفكاري عنه وحكمي عليه وإن في تفسير تاني لكل تصرف أنا مش شايفاه.. هل أنا وقعت في اللي حضرتك حذرتني منه وركزت معاه وخربتها على نفسي؟
هو لما بكلمه إن حاجة حرام بيقول تمام ومش بيعاند في كلمة بس بيعمل الحاجة يوم يومين فمش عارفه هو بيعملها عشان يرضيني ولا فعلا بيتوب ويرجع وساعتها هكون بظلمه.. بس هو شخص معدنه كويس وبيشتغل ومش بيحب حد يجي على أمه وأخته وبيدافع عنهم وبيساعد جده وصاحب واجب
مشكلتي اللي عايزه حل ليها هي عقلي فعلا أنا تعبت من التفكير حاسه
على ما أذكر إني نبهتك للحتة دي ونصحتك فيها قبل كده. ولو أنا فاكر صح، كنت وجهتك لإنك تركزي مع نفسك وتاخدي منه اللي إنتي شايفاه منه وماتقعديش تحفري ورا كل شيء بيعمله
الحياة عبارة عن قرارات. والمشكلة إننا لما نبقى عايزين ناخد قرار بناءً على تأكد ووثوقية ١٠٠٠٠٪، ومش عايزين نفوت تفصيلة إلا لما نطمئن إليها
دي مش حاجة صحية
سهل إن واحد يقول لك: "طالما الموضوع كده سيبيه"
لكن إنتي عندك أسباب للتمسك بيه، وأنا أظن إن ده جزء من المشكلة، لأنه لو ماكنش كده كنتي سيبتيه من نفسك ومالجأتيش للسؤال، وفي الحالة دي الواحد بيفضل في صراع ما بين اللي هو عايزه واللي هو خايف منه
عشان كده لازم تحلي مشكلة التفكير الكتير الأول. خدي وقت افصلي وهدي أفكارك، خلي هو ده هدفك الوحيد، إنسي دلوقتي قرار الزواج أو الانفصال، إنسي دلوقتي أي حاجة ليها علاقة بالمستقبل، اقعدي اذكري ربنا وصلي على النبي ﷺ وادعي إنك تهدي وتعرفي تفكري (بهدوء). ولازم لازم لازم تبطلي تبحثي عن التأكد الكامل، مفيش قرار في الحياة إلا وفيه احتمال وجود نسبة من الخطأ، فإحنا بناخد القرار (بغلبة الظن) مش (بالتأكد)، ودايماً عندنا خط رجعة لو تبين لينا إننا أخدنا القرار الغلط
والله أعلم
____
لو كنت قد أجبت سؤالك بالشكل الكافي يرجى الضغط على زر (✅ محلولة) في يمين الجواب، أو اضغط (💬 أضف تعليقاً) تحت هذا الجواب للاستفسار أو التوضيح
@mustafa بس أنا فعلا محفرتش وراه كل اللي بيعمله ده ظاهر ومتكرر مش مرة ولا اتنين حتى أخواتي الشباب لاحظوا واحد يقولي هو مش طايق أخواته ليه وقالي بيتريق عالناس كتير وخلي بالك عنده شوية تكبر..
واللي خلاني ألجأ للسؤال مش تمسكي بيه أنا بسأل حضرتك عشان بثق فرأي حضرتك جامد حتى أخويا بنفسه لما لاقاني مترددة قالي اسألي الشيخ مصطفى وبسأل عشان بعترف إني معنديش خبرة وعندي عيب إني بقعد أحسبها كتير فده بيخليني أتوه وسط عقلي.. أتمنى حضرتك تجاوبني على سؤالي هل شخص بأفعاله دي راجل مؤتمن فعلا من رأي حضرتك؟
أنا عارفة إن القرار فالآخر ليا حتى أهلي راميين الكرة في ملعبي بس أنا محتاجة حد يساعدني آخد القرار هل لو قلت إنه زي ما كدب عليا فالصغيرة هيكدب فالكبيرة هل ده صح ولا مش كل الناس كده وهكذا
ماقدرش أجاوبك بحكم على شخص ماعرفهوش بشكل مباشر. أنا معرفش عنه غير اللي إنتي بتنقليه، وده مش كافي للحكم
لكن اللي أعرفه حاجتين: إنك دماغك عمالة بتودي وتجيب
وإن المواضيع اللي ذكرتيها موتراكي من ناحية الإقدام على الزواج
والحاجتين دول لما بيطولوا يبقى علامة على صراع عميق، مش مجرد مشكلة موقف أو اثنين
فهنا حاختصر عليكي الطريق وأقول لك: لو إنتي معندكيش سبب للتمسك بيه ومش عارفة تحلي صراعك الداخلي ده فافسخي الخطوبة وملكيش دعوة بأي تفاصيل تخصه وماتحسيش بأي تأنيب ضمير ولا حاجة. خليكي في مشاكلك الشخصية وماتشغليش نفسك ١٪ بمشاكله. سبب إني باقول كده إنك في القصة دي بقالك مدة من ساعت أول سؤال بعثتيهولي لحد دلوقتي ومازلتي مش عارفة تلاقي حل، فهنا ده كده حرق بنزين على الفاضي.
والله أعلم
____
لو كنت قد أجبت سؤالك بالشكل الكافي يرجى الضغط على زر (✅ محلولة) في يمين الجواب، أو اضغط (💬 أضف تعليقاً) تحت هذا الجواب للاستفسار أو التوضيح
@mustafa أنا فضلت شهرين بماطل وملقتش حل فضلت مش مطمنة لزواجي منه فنهيت الخطوبة امبارح.. أنا غلطت إني طولت في الموضوع وهلكت نفسي تفكير بس كان كل شوية حد من الأهل يقولي كلام يخليني أتراجع.. الحمد لله على كل حال ومتشكرة جدا لحضرتك على مساعدتك ليا ربنا يجزيك كل خير ويديم نفعك يارب..
حضرتك مجاوبتش على سؤالي عشان إجابتي مظهرتش ولا أنا كلامي كله ملغبط ومش مفهوم قصدي